10 жилийн уулзалтын тухай

Ангийн анд нартаа удахгүй болохгүй болох шинэ оны баярын мэндийг дэвшүүлье!

Хөөр баясал, дуулиант дурдатгал дүүрэн, оюутан насаа эрдмийн гэрэлт ордон болсон сургуулийн танхимдаа үлдээн амьдралын их харгуйг замнан одоцгоосон 2000 оны дурсгалт хавар бидний сэтгэл зүрхэнд гэрэлтсээр 10 жилийг ардаа орхиж байна. Саяхан л 5 жилийн уулзалтаа дурсамж дүүрэн хийцгээж байсан бол 5 жил гялс өнгөрчээ.

Хааяа хааяахан энд тэнд бар саванд 2, 3-аараа уулздагийг эс тооцвол бүгд нийлсэнгүй удлаа шүү.

МУБИС, хичээлийн байр, лаборатор, Чойжоо, Онолт, Цэдвээ багш, Цэрэндулам эгч, Цомоо эгч.... нартайгаа хамт 4 намраа угтан, 4 хавраа үдсэн.

Тэр л мартагдашгүй хавар /1-р курсын хавар/ нэг ангийн бид нар ГБД-ийн зусланд очин догдолцгоож, угтах маргаашдаа яаран үүрнээсээ холдон одох шувууд шиг өдлөх ухааны жигүүр дэлгэн нисцгээсэн маань нүдэнд илхэн санаанд тодхон байвч даруй 14 жил өнгөрчээ.

Манай төгсөлтийнхэн бид эрээнтэй бараантай амьдралын далайд өөр өөрийн хувь заяа, төөрөг тавилангаар амьдрал жаргалаа дархлан ажил албандаа зүтгэцгээж, нэр бүтэн-зам саруул сайн сайхан явцгааж байна. Гэхдээ сураг байхгүй хэдэн хүнийг эс тооцвол шүү.

Энэ бүх үйлс бүтээл, дурсамж түүхийн эздийн нэг-ангийн эрхэм найз та нартаа 10 жилийн ойн уулзалтынхаа зар, урилга, хөтөлбөрийг бэлтгэж, Та бүхнийг санааг тусгахаар энэхүү захидлыг илгээж байна.

Энэхүү урилгыг нэгэн сэтгэлээр баяртай хүлээн авч, яаран догдолсоор ирнэ гэдэгт огтхон ч эргэлзэхгүй байна.

Бидний уулзалт цугларалтад хэн нэгний маань орон зай онгойж харагдах ёсгүй. Учир нь төгсөлтийн цугларалт бүрэн бүтэн байх нь нэгэн насны андын зохиолтой бидэнд хуруу дарам цөөхөн олдож байгаа уулзалдан золгох завшаан билээ. Анд найз бидний дурсамжийг сэргээн, амьдралын их харгуйд дахин нэг хөгжөөнт дурсамж үлдээх энэ уулзалтанд ирэх хэн нэгэнд маань түр зуурын болон хөдлөнгийн ямар нэгэн шалтаг гарахгүй гэдэгт Би итгэж байна.

Нэг төгсөлтийнхний, нэг ангийнхны халуун сэтгэл бие биесээ даллан дуудаж, хамтын санаачлага оролцоогоор болзоот уулзалтаа бүрэн цогцлоож гэмээ нь хөгжилдэн амрах “төгсөлтийн нөхдийн ажил” маань биелэн бүтэх болно.

Тэгээд ч хэн нэгэн маань ирэхгүй байх аваас 10 жилийн дараах болзоот уулзалт маань хөг дутуу хөгжим лугаа болох бус уу.


Нэгэнт иймийн учир ангийнхаа нөхдийг санагалзан оюутан ахуй сэтгэлээ дэлгээд, хөгтэй дурсамжуудаа “өвөртлөөд” хол ойрын бүгдээрээ тал талаасаа амжиж цуглаад учран золгоцгоох тэр өлзийт өдрийг тэсэн ядан хүлээцгээе.

Миний саналаар :

Болзоот өдөр: 2010.06.18-20-ны өдрүүд буюу 3 өдөр 2 шөнийн хугацаатайгаар эх орныхоо байгалийн үзэсгэлэнд амарч тухлан, хөгжилдөх саналтай байна. Мэдээж хэрэг "Архиа бага ууж, айргаа тааваар уух" нь дамжиггүй. Алсад суугаа Онолт багш, Давка, Өлзий нар ч гэсэн сэтгэл хамтдаа байна гэдэгт эргэлзэхгүй байна.

Та бүхэн саналаа харамгүй бичээрэй.

Үүнийг бичих гэж хамаг цагаа зориулсан шүү. Үг эвлүүлнэ гэдэг хэцүү бэрх даваа юм байна. Гэхдээ сэтгэл байвал ... :)

Ангийн Андуудаа Хүндэтгэсэн Умбажа